يا ترى ادخل لابني اكل بجانب الرضاعة الطبيعية وهو عنده 4 شهور ولا وهو عنده 6 شهور؟؟
طبعا بتسمعي كلام كتير من مامتك انه لازم الطفل ياكل وهو عنده 4 شهور
لازم تعرفي ان في الموضوع ده بيختلف من الطفل التاني ..
تابعي وزن طفلك مرة كل شهر وطالما
بيزيد من 800 جرام لـ 1 كيلو في الشهر اذا ف هو بيزيد الزيادة الطبيعية والرضاعه الطبيعية مغذية ومشبعه بالنسبة له وممكن تستني الاكل لحد 6 شهور
انما لو اقل من 800 جرام زيادة في وزنه في الشهر يبقة لازم تدخلي ليه اكل قبل ال6 شهور
مش معقول هتسيبيه جعان لحد ما يكمل ال6 شهور :)

لو عايزة ابنك يتكلم ويطلب بأدب زي انه يقول
لو سمحت, من فضلك, وعن اذنك
ويتعلم يقول شكرا, وانا اسف
يبقة انتي كمان لازم تتكلمي معاه بالطريقة دي لان هو بيتعلم منك وبيردد كل اللي انتي بتقوليه.. بدل ما تأمرية انه يلم لعبه من على الارض
قوليله لو سمحت شيل اللعب من على الارض ولما يشيلها اشكريه انه ساعدك في ترتيب البيت
هيتعلم منك طريقة الطلب والشكر بلطف وادب بدل الزعيق والصوت العالي :)

الرضاعة الطبيعية بتساعدك انك تخسري وزنك اللي اكتسبتيه اثناء الحمل بسرعة ..
كل ما كانت الرضاعة الطبيعية ماشية بطريقة صحيحة ومغذية لطفلك وبتخلي وزنه يزيد من 800 جرام : 1 كيلو في الشهر
انتي كمان هتخسري وزنك اللي اكتسبتيه اثناء الحمل بسرعه
انتي نفسك ممكن تندهشي من السرعة اللي خسرتي فيها كل الوزن الزائد ده :)

لو انتي ام عصبية ومتوترة.. هتلاقي طفلك على طول عصبي ومتوتر وبيعيط بدون سبب ... 

عياط الطفل في حد ذاته ممكن يكون سبب عصبيتك وتوترك وتنقلي له الاحساس ده وتخليه يزيد في البكاء وتفضلي في دايرة مقفولة بين توترك وبكاؤه

لما تلاقي طفلك بيعيط بدون سبب ... حاولي تكوني هادية على قد ما تقدري.. علشان تنقلي له احساس الهدوء 

آكل ده ولا لا وانا حامل؟؟

اتكلمنا المرة اللي فاتت عن التغذية اثناء الحمل .. وقلنا ان احنا هنبدل كل "الجانك فوودز" بأكل مفيد من الاكل العادي الي احنا بناكلة 
المرة دي هنتكلم بالضبط عن ايه هي الاطعمة المفيدة 

اول حاجه طبعا على رأس قائمة الاكل المفيد هو

اللبن:

اللبن بكل مشتقاته من جبنه وزبادي ولبنة ... ابعدي عن الجبن الحادقة (المالحه) علشان ضغطك ميعلاش لا قدر الله اثناء الحمل ويسبب مشاكل انتي في غنى عنها خلال فترة الحمل 
الالبان بتمد الجسم والجنين بالكالسيوم اللي هتحتاجيه طول فترة الحمل علشان عضمك يستحمل بقية الحمل يا بطلة
وكمان تكوين عضم البيبي واذا احتاج جسمك كالسيوم اضافي اكيد الدكتور هيديهولك في صورة اقراص فيتامين 

الخضروات:

معظمنا احنا امهات الجيل الجديد مبيحبوش ياكلو خضار .. والبركة طبعا في ماكدونالدز وكوك دور وكنتاكي وكل مطاعم "الجنك فوود" الي استوطنت في معدتنا D: ... ولا انكر تماما اني وحده اصيلة من امهات الجيل ده 
بس فترة الحمل والرضاعه شئ تاني خاااااالص .. تعالي على نفسك شوية وكلي خضار حتى لو مطبوخ عادي مش لازم سوتيه على البخار :)
السبانخ والعدس والفاصوليا من اهم الخضروات اثناء فترة الحمل علشان فيهم "الحديد" اللي بيمنع اصابتك واصابة الجنين بالانيميا لا قدر الله واذا احتاج جسمك لكمية حديد اضافية اكيد الدكتور هيديهولك في صورة اقراص فيتامين 
مش حابة الخضار المطبوخ عوضي بطبق سلطة حلو كبير كدة ... مشكل من ما لذ وطاب من الخضار اللي يصلح للسلطة 
طماطم - خيار - جزر - فلفل رومي - بقدونس - جرجير - خس - كابوتشا واي حاجه تاني انتي بتحبيها او ممكن تيجي على بالك وانتي بتعملي طبق السلطة 
الخضار مهم جدا مش لازم تهمليه ابدا فترة الحمل ... انتي بتبني انسجة وعضلات بطل جاي في السكة مش اي كلام :) 

الفواكه:

ودي لا تقل اي اهمية عن الخضروات ... اكيد بتحبي نوع ولا اتنين من الفاكهة مش معقول مش بتحبي الفاكهة كلها ;) 
بس طبعا هتبعدي عن الفواكة اللي ممكن يكون عندك حساسية منها .. في بعض الناس بيكون عندهم حساسية من المانجو والفراولة والموز .. انتي ادرى بنفسك وبجسمك طبعا 
ممكن تعملي الفاكهة عصير لو مش حابة تاكليها زي ما هي .. المهم تاخدي الفايده منها 
التفاح والبرتقال من اهم الفواكه المفيدة للحامل 

اللحوم والبيض والاسماك 

دي شئ اساسي في اكلك يوميا .. حتى لو بيضة وحده في اليوم مع كوباية اللبن الصبح كده ويبقة افيد فطار ليكي كحامل 
والاسماك طبعا مفيدة جدااااا جدااا جدا 
ده اذا لم يمنعك الدكتور بتاعك من نوع من انواع اللحوم او من البيض ... لان في بعض الحالات بيكون خطر على الحامل اكل نوع معين من اللحوم او لو عندها زيادة زلال في الدم ممكن الدكتور يمنعها من البيض 
زي ما قلنا قبل كدة الدكتور مرجعك الوحيد في الاستفسارات دي .. لان هو اللي متابعك وعارف حملك ماشي ازاي 

المياه 

اتوصي بالمياه جداااااااااا وانتي حامل ... اهم حاجه بتعملها المياه اثناء الحمل هي انها بتبعدك عن خطر الامساك .. الامساك شئ مش كويس خالص اثناء الحمل .. 

المرة الجاية ان شاء الله هنتكلم على الاكل اللي لازم تبعدي عنه وانتي حامل .. 

مــبروك .. انتي حامل

مبروك انتي حامل 
مبروك المدام حامل 
الف مبروك التحليل ايجابي .. انتي حامل 
دي الكلمات اللي تقريبا غيرت حياة معظمنا كسيدات 
انتي دلوقتي مش مسؤولة عن نفسك وبس !! .. انتي دلوقتي مسؤولة عن روح تانية جواكي 
روح بتتنفس معاكي .. روح قلبها بيدق جواكي .. دمها من دمك 
خلاص الاستهتار والاهمال في نفسي وفي صحتي وفي اكلي ده مينفعش استمر عليه .. مش علشاني انا لا .. ده علشان ابني اللي عايش جوايا .. التخطيط لحياته الصحية بيبدأ من اللحظة دي 

اول حاجه بديهيه طبعا لازم تعمليها اول ما تعرفي انك حامل .. انك تروحي على طول لدكتورعلشان تتابعي معاه طوال فترة الحمل 
دي حاجه مش محتاجة موضوع ولا نصايح ..ده شئ طبعا بديهي جدا جدا جدا

تاني حاجه لازم تاخدي بالك منها وانتي حامل هي صحتك وتغذيتك 
هاكل اكل صحي ومغذي ... هبدل البرجر والجانك فودز بخضار .. 
هبدل البيبسي والميراندا والعصيرات المحفوظة بعصيرات فريش ولبن 
في وسط الوجبات بدل الشيبسي والحلويات ..
هفتح التلاجه واكل خيار وطماطم وخس 
لما نفسي تروح للشيكولاته ... هاكل مكانها معلقة عسل .. افيد مش كدة ؟؟ :)) 
الا بقة لو بتتوحمي دي حاجه تانيه ..
مش عايزين الباشا يشرف في دراعة حتة شيكولاتايه D: 
بس عارفة انا الحركات دي ..
متاخديش الوحم حجه انك تاكلي اكل مش مفيد على طول D:
مش هقولك بقة تاكلي سوتية مسلوق على البخار وفاصوليا مش عارفه معمولة ازاي .. لا خالص .. 
تاكلي الاكل العادي بتاع اي اسرة مصرية او عربية عريقة ... الاكل المغذي بجد .. 
الخضار مطبوخ عادي .. واللحوم والاسماك عادي طبعا (في حالة لو ممنعكيش الدكتور من حاجه منهم) 
ركزي جدا على التغذية .. علشان زي دايما ما بتسمعي في المسلسلات والافلام ..
"انتي مش لوحدك دلوقتي انتي بتاكلي لاتنين" ..
وغالبا بنفهم الجملة دي انك لازم تضاعفي كمية الاكل اللي بتاكلية .. ولكن في الحقيقة هي انك لازم تاخدي بالك اكتر من الاكل اللي بتاكليه حتى ولو كانت الكمية قليلة بس المهم يكون مفيد
وطبيعي جدا ان في الشهور الاولانية من الحمل يكون ملكيش نفس للاكل .. ما تضغطيش على نفسك علشان متتعبيش 
قسمي ال3 وجبات ل 6 وجبات .. هتاكلي نفس الكمية بس على فترات مش هتحسي بتعب وفي نفس الوقت هتستفيدي بالغذا 
ومتقلقيش مع تقدم شهور الحمل .. هتتحول لوحش ما بيبطلش اكل يا معلم :)) 

طبعا اول حاجه نطت في دماغك دلوقتي لما قلتلك انك هتتحولي لوحش .. هي وزنك اللي هيزيد ومش هتعرفي تخسريه بسهولة بعد الولادة 
احب اقولك متقلقيش خالص من الموضوع ده .. الوزن ده ممكن تخسرية بسهولة جدا بعد الولادة لو انتي فعلا بتاكلي اكل مغذي ومفيد مش "جانك فوود" 
ولما نوصل ان شاء الله لمرحلة الرضاعه الطبيعية .. هقولك الوزن ده هتخسرية بسهولة ازاي .. بل وممكن تندهشي من نفسك انك خسرتي كل الوزن ده في فترة قليلة جدااااااااا 
خلي كل تركيزك دلوقتي في انك ازاي تعدي فترة الحمل ان شاء الله بامان وسلام وصحة .. 

واخيرا: الراحة والبعد عن المجهود خصوصا في فترة الحمل الاولانية 
وده بيختلف من وحده للتانيه ... وعلى حسب ما الدكتور بتاعك هيقولك 
في ناس بتحتاج الراحه دي في الفترة الاولانية بس .. وناس تانية بتحتاجها طول الحمل .. وناس بتبقة محتاجه راحة مضاعفه 
فترة الحمل هي الفترة اللي لازم تتبعي فيها كل نصايح الدكتور بحذافيرها 
لحد ما ان شاء الله تقومي بالسلامة 
ويشرف احلى نونو وينورلك الدنيا 

ماما على ارض الواقع

اسمحولي الاول اتكلم عن نفسي شوية .. هصدعكم بقة استحملوني
 انا ام يعتبر صغيرة اوعو تفكروني ماما عجوزة بقة وكدة ..
بنتي عندها حاليا سنتين وحقيقي كانو اجمل سنتين في حياتي وانا بتفرج عليها بتكبر لحظة بلحظة قدامي
ندخل في الموضوع بقة:
كأم جديدة كنت بدور على المعلومات اللي تفيدني فعلا على ارض الواقع .. بعيدا عن كلام الدكاترة المكلكع .. وبعيدا عن اقدمية نصايح جدتي وجدتك اللي في منها مفيد فعلا بس كتير منها صعب يتطبق دلوقتي مع تطور الطبيعي للاطفال عبر الزمن :)
وبعيدا عن نصايح برامج التلفيزيون اللي احيانا بتكون صعبة التنفيذ لانها مثالية زيادة عن اللزوم .. محتاجه تتنفذ بالخطوة والورقة والقلم
ولما بقيت ام عرفت ان فعلا ان الطفل صعب جدا يمشي بالورقة والقلم لانه في الاول والاخر طفل مش مسؤول عن تصرفاته وعفوي جدا
بالنسبة ليا كان اكتر حاجه علمتني وفادتني هي الغوص في قلب التجربة ... والتعامل مع الطفل على ارض الواقع
فصلت كلام الدكتور ليناسب ارض الواقع ...
فصلت نصايح جدتي لتناسب زماننا وزمن اطفالنا ..
فصلت برامج التلفزيون لتناسب التجربة الحقيقية بعيدا عن المثالية
سمعت نصايح كتير واخدت منها اللي يناسب بنتي واللي مينسابهش ما كانش عندي اصرار اني اعمله لان بالطبع كل طفل بيختلف عن التاني ومش معنى ان فلانه عملت "كذا" مع بنتها يبقة "كذا" ده هيناسب بنتي ..
بس ده ما يمنعش ان في حاجات بسيطة جدا بيشترك فيها الاطفال كلها وهنتكلم عن المختلف والمتطابق مع بعض وحده وحده بالتفصيل
واهم شئ .. انك كأم يكون بالك طويل طويل طويل طويل جدا :)
استمتعي كل الاستمتاع بتجربتك كأم .. ثقفي نفسك عن كل حاجه متعلقة بالامومة من وانتِ حامل ..
المعلومات اللي هتقريها اثناء الحمل هتتحفر في ذهنك لانك هتكوني عايزة تسعدي ابنك او بنتك اللي جاي في السكة باي طريقة ..
بعد ما يوصل بالسلامة هتلاقي اللي ينفع يتطبق منها واللي مينفعش بس هتكوني خضتي التجربة
وخليها حلقة في ودنك زي ما انتي هتعلمي ابنك او بنتك .. انتي كمان هتتعلمي معاهم كتير
اتمنى ان كلامي ده يكون مفيد لكم .. سواء كنتي لسه حامل .. او كنتي ام جديدة بتدوري على اللي يفيدك ويفيد ابنك
وعلى طريقة برامج التليفيزون 
اشوفكم الحلقة الجاية :)